March 20, 2008

紅白藍新機繩

今朝一早收到之前係yahoo網上bid返黎果條新機繩,本來心情應該係開心,可惜我卻有d失落感。點解?因為我買貴左好多囉!!!! yahoo網上bid返黎$399。過左數,正在等賣家寄黎嘅時候而我又心郁郁想睇下仲有咩賣之際...@@點知比我發現變左...唔係掛$299!! 丫~~~點解~~~~?於是我好嬲,再跟住呢個牌子上韓國網到勁搵。可能係個心想搵一d令自己舒服d嘅答案掛(丫~原來韓國果邊都係賣差唔多啵!)咁自己個心都好過d丫。點知...我搵到原來韓國仲平囉,$1xx!!! 我真係嬲到震呀!!!

不過最後放工返黎將佢扣上部機度之後,哇~好靚丫!開心返晒~呢個經驗又一次教訓我,下次買完野,都係唔好再去睇佢既價錢喇,免得自己傷心啦!

March 12, 2008

一本"貓"書

記得有一次睇雜誌,介紹咗一本關於貓嘅書《貓娘貓糧》,一睇到佢既封面就比佢吸引住(尤其係個書名特別有趣),相信愛貓之人都一定會鍾意,好奇嘅我就決定去書店找尋!終於比我喺書店搵到佢,哈哈~打開本書見到好多貓貓嘅得意表情,我一邊睇一邊笑,好開心!如果我都可以做一本書比b仔就好喇!(可惜我冇咁嘅才華)

書中內容係講述作者家中三隻貓貓既有趣事,佢地d表情真係好好笑,愛貓之人快d去買啦!!!

喵~~~~~~~~



March 9, 2008

P.S. I Love You



Jerry因腫瘤而逝世,但捨不得自己最愛的妻子要獨自過以後的生活,而女主角Holly因失去了最愛的丈夫幾乎令整個人崩潰。幸好Jerry在走前已安排了一切,為她留下了十二封信,由妻子 30歲生日的那一天開始,分別用不同的方式傳送到她手中。這十二封信,陪伴她渡過了十二個月孤獨的日子,一直從心靈上支持著她,引導她向新生活出發,令Holly可以向前看,更對新的婚姻及人生路程有新的看法。

一套好感人的movie,一邊睇一邊喊,但到最後會笑住離開戲院。當你知道自己會離開世上既時候,你會唔會好似男主角咁為最愛既人安排好一切?最後留返落黎既人係最痛苦,如果你愛你既另一半,就唔可以比佢更早離開,所以保持住健康既身體亦都係愛一個人應該有嘅態度,雖然有時可能會事與願違,但至少我們有努力過...Jerry 應該明白到呢一點,所以先要用盡辦法令最愛能夠企返起身。希望身邊所有既人都可以同另一半白頭到老!!

◎◎◎◎◎◎◎◎◎◎

睇完要去YY個婚禮,幾驚睇戲果陣會喊到個妝都甩埋啊!哈哈~每次去朋友嘅婚禮,新娘新朗步入會場然後都會上台上講一番說話,大概都係話多謝爸爸媽媽一直以來既照顧.....blar blar blar....,我通常都會睇到眼濕濕,眼見一位一位好朋友得到幸福,心裡面都覺得好開心,希望你地同另一半可以白頭到老!聽到YY最後一句話 "你地放心啦,我已經搵到一個可以付託終生既人" 冇錯!你已經找到了!近期有好多好朋友結婚啊,原來我地都大個了,哈哈! 回想返我地學生時期,好似係好近既事,原來日子真係過得好快。所以我都要珍惜每一日,好好去感受下生活嘅點點滴滴。

P.S. I Love You

March 2, 2008

Pictionary

最鍾意成班朋友玩d group既 game,而最好玩既莫過於pictionary,呢個遊戲真係玩到人地失聲。今次八個人玩我地分開左四組,雖然每組只得兩個人,但就更要表現出大家既默契,最重要梗係考下大家既急才啦!玩完呢個game次後...發現左每個人既"才能" 有d人會將一樣野畫得好仔細;有d人就會用好簡單既圖畫佢代替;有d人一亂就會諗唔到野;有d人腦筋轉得好快,好容易就諗到用咩圖去表達。總之就係笑到我有氣冇定抖!! 點知...今朝一早起身...丫~~丫~~個喉嚨痛到呢... 應該係尋晚笑到失左聲了!因為...真係好好笑!哈哈哈哈~~我...笑死左

喂~~~~幾時再玩過先???