我找到了大雄

踏入2009年2月14日晚上的00:00am (好準時....)，電話響起......

情人節嘅第一句 "情人節快樂"，仲話情人節禮物已經一早準備喺天台上!? (做乜今次咁有新意?)

　

走上去一打開門，見到一個公仔著住我嘅Dream wedding gown (唔係咁似掛....)

真係同我夢想嘅好似，一層層嘅羽毛同紗，好靚！！

　

跟住再見到有人著住西裝，咦？仲有個琴喎．．．哈哈 (玩到咁大?? )

　

琴聲響起．．．

　「自問是未滿分　自問是沒信心　實在是未夠本事
　　我卻要發威一次　太抱歉你未同意
　　我要這世界知　我愛你有幾痴　一想起都覺自私
　　宣佈吧　我愛你　can u marry me be my wife」

　

天台、你設計嘅婚紗、琴、介子、diary。

diary係用來記底左呢幾個月來為我準備嘅每一件事同每一個細節！

(知喇知喇，知你慘喇！ )

　

唔怪之得果排成日咁多街去，原來愉愉地去咗學琴！

(係咪好想睇下佢自彈自唱果緊張樣?? 呵呵呵～～)

　　

　

你令我過咗一個難忘嘅情人節，多謝你！

我永遠會記得呢一日，一生人第一次有人同我求婚，亦係最後一次。

　

台北之旅(最終回) ～失而復得

終於玩完幾日既行程，要返香港喇！！！
返香港之前唔好唔記得要先去機場做ｄ好緊要嘅事。
　
上回講到一落機呀Mil就唔見左個袋，真係黑仔！
唯有等最後一個希望就係睇返當日嘅錄影帶，
希望見到係工作人員拎左啦！(雖然九成搵唔返)
　
　
一邊睇住個video嘅心情真係好難過，我地睇住自己行埋架車度，
睇住自己唔理個袋，跟住上左車.....走左.....>_< 過左十幾分鐘，
有個紅衫嘅工作人員發現我地架手推車！＠＠ 吓.....
就係我地第一日返轉頭問佢有冇見過個袋果個人呀~~~~~有冇攪錯！！
佢竟然將架手推車推埋一邊，然後.....唔理佢走左....(冇野下話！)
再過一陣有個著黑色便服嘅男人行咗埋去企一陣跟住拎走個袋！(嗚~~~~)
　
OH SHIT!!!!!!!!　咁係咪即係無跡可尋？
呀SIR話如果係旅客嘅話，跟本冇辦法可以搵到佢。
咁．．．咪唯有走囉！>_< 走之前同呀陳Sir講，
請佢有咩消息就要通知我哋台灣嘅朋友啦。
　
　
奇蹟出現喇！！！！！
返到香港第二日收到Jeff打黎叫我請食飯。 (咩事先....)
原來佢話搵返個袋喇！(咁奇＠＠)
話說果日呀陳Sir繼續追查個黑衣人下落，足足睇晒機場唔同既cam。
最後....黑衣人上巴士走咗 (我暈了！) 由於個Cam太模糊，
根本睇唔清佢個樣。 不過陳Sir靈機一觸，覺得佢有ｄ似其中一個員工，
於是叫佢返來用 "特別嘅方法" 盤問佢，點知....認咗！！
　
Yeah~~~~~~真係God Bless us 呀
　
　
飲得杯落啦！！ 呀Mil即時開心返晒，因為唔洗買過ｄo野比我吖嘛！

台北之旅(五) ～小型電單車

回香港前的最後一天，Jeff建議不如去玩小型電單車啦，
因為香港未必有幾會玩，好似好得意喎！

大約一個小時車程去到八里，見到一個大大既湖。好靚呀～～～
湖邊有好多人踩單車同玩小型電單車！
唔理"三七廿一"我地快快去租返一架玩啦！！！
一人揀一架唔同樣先 ^0^


Jeff你會不會太烈火戰車feel？你估你係劉華咩！！哈哈
　
　

我同Renni借左Jeff同Mil嘅型車影番張相，扮下型丫嘛！
　　
　

呢架好似師奶去買菜嘅"型"車先係我嘅！吹咩～～～我覺得咁樣坐得舒服ｄ囉！
　
　

湖邊好靚，我哋忍唔住要停底影下相
　
　

Renni 影底我影相嘅背影　hehe~
　
　
　
photo by Jeff, Renni & Eunice

台北之旅(四) ～行街買物篇

去到邊都要行街，去到台灣都唔例外啦！
第一日一落機就去咗東區嘅特色小店行吓。
原來有好多香港嘅店啊！
　
　

呢間係Jeff 同Renni 嘅朋友嘅店，好有特色架！^0^
　
　

店入面仲有識笑嘅狗仔，哈哈哈～～好可愛。
　
　

我搵到一個好得意既公仔，跟住發現好似一個人！@@
　
　

哈哈哈哈～～同Jeff一樣樣架，唔通係為佢而做嘅？

　
　
　
台灣唔算好多o野買，所以今天行程都唔係洗左太多錢！

不過有ｄ ITEM 係必買嘅！(人地話.....)
　

一大堆"我的美麗日記"，其實好唔好用架？
點解個個friend都叫我買？(大家想唔想試吓?)
　
　

去台灣必去就梗係去誠品買書啦，我都唔執輸買左一大堆返來！

好似真係平香港好多啵，而且好多選擇呀～～～
我哋足足留左幾個鐘左揀右揀，最後揀左呢幾本！！

台北之旅(三) ～我們相遇了

　

Sigrid, Nia 跟 Twiggy，三位對lomo及攝影非常狂熱的台灣女生。
我們終於見面了！！！　

第一次看見一班對lomo及影相是這樣有熱誠及執著的女生，

跟她們一起去拍照實在太開心了，真的好想常常可以跟妳們一起去拍照！

我們一起去Shopping，

我們一起去拍照，
我們去喝Coffee，

我們討論對拍照的執著，

我們笑說著愛貓之人的生活，
我們無所不談。

因為
我們都愛拍照，

我們愛lomo，

我們還愛貓咪。

還有，我們都是女生！

　


猜猜誰是 Nia 跟 Twiggy？^0^ 我們還放到滿桌子都是相機呢！
　

可愛的Sigrid，也是愛貓之人。笑容超sweet的！

　

　

　

Twiggy, Renni & Eunice第二天再見

　
第二天還在這Cafe喝到一杯超正的Mocha　
　
　

　

　
好高興可以跟妳們見面，

已經開始想念妳們了～
希望快點在香港見啦！
等妳喔～～～
　
miss you all.

　

　

台北之旅(二) ～行到邊食到邊

難得嚟旅行，總唔可以日日苦瓜咁樣仲比ｄ不快嘅心情影響。
唯有先放下沉重嘅心情，嚟台灣第一件事梗係要去食番夠本啦！
等我先介紹下呢幾日行程食過嘅正嘢先！！ :P


東區嘅美味漢堡店 - GoodDay
聽Renni講，呢間漢堡店平時排晒長龍，所以連佢自己都未試過。
今次黎到因為上班時間關係，一入去就有位坐喇！ yeah~~
通常一個set我都都會先食薯條，而呢度最特別係你可以自由選擇不同醬去配薯條，
我哋揀左三款，cheddar cheese、honey mustard 同埋 sour sream。
薯條同薯角非常之好味，食到停唔到，一定要試吓！
而burger同hot dog都OK啦， 因為已經俾薯條搶晒風頭了。


我同Mil 食到停唔到啊^0^


Jeff同Renni原來都係第一次食


認住門口呢個薑餅人就搵到架喇 ^.^
　
　
無無聊聊逛夜市 - 台北各夜市
嚟台灣冇可能唔去試下特別嘅夜市，真係咩都有得食架！
除左食之餘仲有好多平嘢買呢，而且各個夜市都有唔同特色。
而我哋今次揀咗 "饒河夜市" 同 "士林夜市"，一於食通街。
　

　

好好味嘅蔥餅，好香呀～～

　

呢個焗薯係我認為最好味既，你睇吓ｄ芝士醬先吖！
　

唔只有嘢食，仲有好多嘢買。我買左好多對襪褲，足足平香港一半有多！
　
　

香港台灣都有嘅 - 鼎泰豐
未嚟台北之前，有ｄ朋友叫我一定要去試下台灣嘅鼎泰豐，

而有ｄ朋友又會話 "唔係好好食咋喎，一般啦！"

由於我都幾喜愛食上海菜，我決定一定要去試下。

小籠飽其實同香港食到嘅差唔多，有ｄ可能仲好味過佢添
不過細細粒可以一啖食晒落口，其實都算唔錯啦！

　

呢個係我認為最好味嘅蒸菜肉餃，味道唔係好濃不過入面嘅菜切得好細緻，
其實好考功夫架！食之前飲啖清水先，就會食到佢嘅味道了。

　

Jeff同Renni都話其實唔錯，反而最普通係個小籠包，
不過嚟得食上海菜又點可以唔點呢！？

　

其餘我哋仲叫咗烤夫，油豆腐粉絲湯，菜肉大包同埋台灣牛肉麵 等等．．．多到唔記得咗

埋單大約二千幾台幣，即係港幣六百幾。五個人食到攬住個肚走，仲有ｄ要打包添！

其實真係好抵食喇，又唔係一萬幾千一餐，有時唔好要求太高啦！

最緊要食得開心丫嘛，係咪？

　

　

行到邊食到邊之 - 街邊麵檔

睇完場戲大約十點幾，周圍嘅食肆都關門啦！

袁生袁太話不如去試下ｄ地道特色麵檔喎。

好啦～就去食個消夜先！

　

豆腐皮蛋係Mil嘅至愛，記得攪埋佢一堆嚟食啵。
　

呢ｄ咁地道嘅麵檔香港冇乜機會食到架！

　
　
台灣的 Chili's Grill & Bar

日日咁食法，有時真係食到冇晒idea。隨便搵一間餐廳食下啦！

行咗入一間叫Chili's嘅美式餐廳，都唔錯喎。

　

　

洋蔥圈好香好味啊，加埋個醬嘅味道好襯！

　

仲叫咗salad同小食添 ！

　
　
好味道Pizza意粉 - Bellini Pasta Pasta

之前睇戲果時行過呢間餐廳排晒長龍就知道佢一定有來頭，

所以今日專誠嚟試下佢有幾巴閉。

一行入餐廳已經可以聞到濃濃嘅芝士香味了！

就叫一個四人餐啦。^0^
　

呢個cream soup真係太好飲了。仲有pizza係薄薄嘅餅底，呢ｄ先係正宗嘅意大利pizza吖嘛！
(不過因為食得太開心嘅關係，唔記得咗影相添 :P)
　

最後呢個四人餐會提供一個四款不同嘅Cake，等你可以試晒咁多個口味吖嘛！
不過試完之後，我覺得款款都好好味啊！！

　
　
黑朱古力愛好者必去嘅 - Black as chocolate

食左咁多主菜，都係時候食吓甜品啦！

呢間 "黃湘怡的蛋糕店" 最適合愛黑朱古力嘅人去。

最出名嘅係佢一ｄ都唔會過甜嘅Classic chocolate cake，

同埋黑朱古雪糕，而我當然就係黑朱古力愛好者啦。
　

雪糕口味分別有兩種，dark choc. 同埋 brandied cherries with dark choc.

食起黎．．．好似冇咩分別喎！@@
　

買咗一個Classic chocolate cake返去，一口氣俾我哋食左一半，勁唔勁？
　
　

台灣真係好多美食，而且價錢比起香港食嘢平好多添！
我諗．．．我去完台北之後應該係會肥咗 =_="
　
　
待續．．．

台北之旅(一) ～黑仔王

所以話，一個人黑起上黎真係唔到你唔信。
本來帶住興奮嘅心情收拾行李準備出發去台北，
兩個人，機部相機同一大堆菲林，索性去影個夠本。





一落機見到好耐冇見嘅Renni同埋Jeff黎接我哋機，
急不及待將大件細件行李放到車尾箱之後就準備返Renni屋企。

到步後將行李由車尾箱拎出來之際，Mil就話 "咦！我個袋呢？"
SHIT！！！ 唔係下話！？估計應該係放行李時拎漏咗，今天真係大獲！
拿拿聲飛返去機場搵。


去到見到推行李車嘅工作人員即刻捉住嚟問....
"不好意思，請問你剛剛有沒有看到一個黑色的包包在那邊的行李車上？"
"沒有啊，如果一看到我們一定會交到警察那邊的。"（工作人員）

再飛奔去警察哥哥度問....
"不好意思，我們剛剛忘記拿行李車上的包包，請問有沒有人交到這邊來？"
"這邊沒有耶，我幫你打去第一分隊看看。"（警察先生）

再過一陣....
"還是沒有，我想你先留下資料如果找到的話就連絡你。"（警察先生）
"好吧..."
"包包裏有什麼？"（警察先生）
"兩台相機、MP3、圍巾、PSP、底片．．．"（邊數邊想喊 >_<）

"還是我們可以看一下拍到的VIDEO？"
"可以啊，不過那邊禮拜一才開始上班，你到時候再來吧。
不過如果拍到的是旅客也沒辦法找到他，
如果是工作人員的話應該都會拿來這邊了。"（警察先生）


聽完之後唯有好失望咁離開，回程嘅時候數一下袋入面唔見咗嘅相機同鏡頭，我真係想喊囉！
F80同鏡都係新買架！！(一筒FILM都未入落去影過) 仲有我部LCA+，係俄羅斯鏡黎丫！
夾埋唔見左成萬蚊嘢 ，真係破財擋災咩？？
（除咗咁安慰自己同Mil，我仲可以講ｄ咩）


一黎到台灣就發生左ｄ咁嘅事， 叫我仲邊有心機玩呀？


待續．．．